L’asuntu Valledor anima’l cotarru

colungaEsti home a manzorga podría ser el primer diputáu de la esquierda nacionalista na historia de la Xunta Xeneral d’Asturies si finalmente nun hai sorpreses estrañes. Esti home, Roberto Colunga, va ser quien ocupe’l sitiu qu’ ocupara García Valledor, principal representante del ala asturianista d’una Izquierda Xunida cada vuelta más empozada y desnortiada, como amosó Jesús Iglesias cola so reaición a la dimisión del diputáu.

La verdá ye que too esti asuntu ye mui interesante, y a nós, polo menos, fainos pensar que hai daqué esperanza. Y paez que nun somos los únicos. De mano, la entrada de Colunga na Xunta Xeneral, anque de rebote, diba ser un ésitu a apuntar a la estratexa empobinada va unos añinos pol Bloque por Asturies. Qu’el nacionalismu d’esquierda tea na Xunta Xeneral nun ye poco. Habrá quien diga lo de la poltrona, lo del pesebre, lo de los atechaos… pero lo cierto ye qu’el Bloque va tener la oportunidá de facer realmente visible qu’existe una opción política que ve Asturies como dalgo muncho más allá d’una mera sucursal política, d’una mera provincia colos sos tipismos entrañables.

Ta claro que, pa eso, nun val con aposentar el culu na poltrona, y el Bloque fadrá por apurrir el so sellu a la política autonómica como lo vien faciendo nel campu llocal (col exemplu destacáu de Ḷḷena). Ver se verá. Pero sí que sedría agora’l momentu de tar sollertes.

Otra cosa ye lo que pase d’equí a un añu. Que dalgo tendrá que pasar. Valledor tien ganes, como pue lleese ‘ente llínies’ na entrevista que-y fai Xuan Bello en Les Noticies. Y tien ganes de facer dalgo básicu: una formación qu’anteponga los obxetivos políticos de la sociedá asturiana a los del partíu. Asina de simple, ¿o non? Hai un puntu especialmente interesante na entrevista que ye lo del pesu del ‘clixé’ d’Izquierda Xunida como ‘llave’ atada ideolóxicamente al PSOE, y non como opción autónoma, capaz de pautar o sofitar iniciatives de ‘la derecha’, si procediera.

La cosa ponse interesante, hai un rellumu d’esperanza nuna fastera tan murnia como la que se vien viviendo nel asturianismu nos años últimos.

Valledor sal de la Xunta Xeneral cásique incólume: sacante les crítiques que-y llancen dende la so propia formación, los ataques más duros que-y lleguen son pa acusa-y d’haber cobrao el so sueldu de diputáu o haber dío al estranxeru en viaxe oficial ¿? A lo meyor tamos énte un candidatu presentable y con presencia, ilusionante pa una parte bultable de la sociedá asturiana. Sólo falta ver en qué apara too esto. ¿Ye’l momentu de la xuntanza? Namás se puede desear, a tol asturianismu, muncha ‘mano izquierda’ pol bien del país.

Dexámosvos como ambientación el videu esti d’Arma X, una nueva ‘Patria sin sol’ que nunca veremos na TPA.

3 pensamientos en “L’asuntu Valledor anima’l cotarru”

  1. Claro qu’anima’l cotarru. Camiento que los que naguamos por cierta sensibilidá cola identidá asturiana por parte de los políticos asturianos con representación, tamos a la espera. Revolver l’asuntu nun pue ser malo pa nós, seique, tolo contrario porque nun tenemos nada que perder.
    Saludos candiales y gracies pol enllaz 😉

  2. voy tocar los coyones un poquinhin ,,, 😉 …. que un caradura del bloque por Spain entre de rebote na xunta xeneral de verda tien tantu interes ,,, que Valledor quiera montar un partiu de la izquierda mas o menos extrema y extraparlamentariu ,,, nun ye mas de lo mesmo, cuantos teneis ya ,,, ?

  3. Ai ayalgueru, provocador… Precisamente si dalgo diba animar lo que pase cola salida de Valledor y la entrada del Bloque ye precisamente la posibilidá de que salga dalgo qu’aspira en serio a nun ser extraparlamentariu. ¿Extremu? Nun ye lo que paez de les sos declaraciones… habra que ver, y ver veremos… Tolo demás ye tan murniu

Leave a Reply

Your email address will not be published. Required fields are marked *

*