Ayeri lleí a Xuan Bello

Xuan BelloAyeri lleí la columna de Xuan Bello en ‘Les Noticies‘ y prestóme. Préstame munches vegaes, pero ayeri especialmente. Serenamente, desplicó per ónde va dir el so votu ensin pedilu dafechu pa esi asturianismu d’izquierdes posibilista al que piensa votar, pero envolviéndolu, el votu, de ‘seny’ aposentáu. Esi ‘bon xacíu’ que busca tresmitir na columna, ye’l que fai que munchos vayan dir nestes elecciones a votar a Izquierda Xunida como si ello fuera ‘votu útil’, y lo entiendo. Pero pela mio parte nun creo que mereza’l mio votu daquién que nun cumple con bien d’ellos de los compromisos ‘fundamentales’ colos que foron a les pasaes elecciones. Pase que’l sociu minoritariu del gobiernu quiera facer como que se tapa la nariz énte aquellos episodios ‘menores’ nos que la podredume del mayoritariu rescampla especialmente (Candido-Morala, Teleasturias, ‘Construyendo Asturias’ y demás propaganda…), pero lo que nun ye de recibo ye que se pretenda facer lo mesmu con les ‘grandes apuestes’. Que se pase por una política urbanística xabaz, por un modelu enerxéticu descomanáu y proxectáu dende Madrid, que s’acombaye cola corrupción de baxa escala (esa que diz: ‘agora mos toca contratar, o meter nos conseyos d’alministración, a los de nueso’), o que se proteste polo baxo non yá pola falta d’oficialidá de la llingua, sinon pola falta total d’interés en desendolcar les midíes previstes na Llei d’Usu y promoción.

Too eso, y más, fai que munchos mos sintamos estafaos. Y por eso miramos agora pa quienes, con munches torgues pel medio, intenten construir una alternativa propia, d’izquierdes, asturiana y con esi ‘seny’ que los ‘nacionaliegos puros’ nun amosaron nunca. Por eso merez la pena reconocer, haya o non un diputáu llueu, esi esfuerzu, esi enfotu nun proyeutu políticu que busca el so espaciu y que, espero, tenga munchu recorríu per delante. Yá saben, equí sofitamos Unidá.

3 comentarios en “Ayeri lleí a Xuan Bello”

  1. Bones por mor de problemes teunicos que yo mesmu creyé, tuvi de treslladar el blogue “Fueya en Blancu” a la direición http://fueyaenblancu.blogspot.com/ entá queden coses por iguar y por incluyir, pero polo menos nun perdí tolos posts. Como veis camudé un pocoñin l’estilu, espero que vos preste a toos y que camudeis en cuantes podais l’enllaz a Fueya en Blancu. Un saludu

  2. yo nun soy d’izquierdes pa nada la verda sea dicha ( y asturies lo ultimo que necesita ye mas socialusmu ) y la puesta en practica d’agunos de los puntos del programa d’unida diben ser el final de la nuesu probetayu sector privau y la nuestra economia.

    Teniendo dicho esto nestes tamien votaria Unida. Aunque solo seya porque unu de los socios de la coalicion Andecha ye l’unicu partiu extraparlamentariu que se tomo la molestia de saca-y les verguenzes a la FSA ( casu “construyendo asturias” ? llamabase asina ? ) etc . Por honradez , por respetu al estau de derechu , por premia-yos l’esfuerciu y por salu democratica diba ser pa UNIDA.

    saludinos

Zarráronse los comentarios.