¿Alón a la década de la travesía pel desiertu?

logos¿Qué balance se pue facer de la década que ta a piques d’acabar no que cinca al asturianismu? Ye d’esperar que, de dalguna manera, lo asocedío pente l’añu 2000 y el 2009 nun foi tan ruino como pudiera paecer. A lo meyor tamos énte un escenariu nuevu depués de diez años d’un movimientu en víes de madurecer y de presentase énte’l restu la sociedá d’un mou enforma más convincente, creible y serio de lo que se pudo facer dende los setenta.

La década entamaba cola resaca de la gran crisis nel principal partíu asturianista de la historia. El Pas, condergáu al extraparlamentarismu polos propios errores y por un rexonalismu d’ocasión como’l de Uras, nun supo aprovechar la posición algamada na década anterior p’axuntar y abellugar el sentir asturianista. Poro, anicióse una desintegración que nun aparó hasta va poco.

Los resultaos electorales d’aquel 1999, col PSOE en mayoría absoluta, dexaron en nada les posibilidaes del rexonalismu ramplón de la Unión Renovadora Asturiana, que bien lluéu foi perdiendo fuelle col gruesu de les sos files tornando cola cabeza gacha al llar del PP.

Pel lláu de la izquierda nacionalista, too diba movese nesta década a guelpe de convocatoria electoral. Nes primeres autonómiques, les de 2003, aquella INA de Rafa Palacios, ún de los vértices de l’atomización d’esta estaya del asturianismu, diba reñacer en forma de Bloque por Asturies pa abrir una estratexa nueva, en xuntanza con una Izquierda Xunida necesitada de recuperar la so posición de tercer fuercia política na Xunta Xeneral. Y l’esperimentu funcionó, especialmente pa IX, qu’entró nun gobiernu nel qu’el pesu del Bloque vióse especialmente nel ‘internacionalismu’ del cargu concedíu a Palacios como responsable de Cooperación.

Aquella primer lexislatura de la ‘esquierda plural’ foi la d’un ciertu espoxigue de la presencia institucional de la llingua asturiana, del anicio de la igua de la toponimia y de dalguna otra aición cosmética sin que s’avanzara munchu más nel enfotu en ‘facer país’ del asturianismu. Cierto ye, la representatividá nun daba pa muncho más.

Nes mesmes eleiciones de 2003, confirmábase l’esbarrumbe d’un Pas al debalu, mentes que Uras diba amosase como lo que foi: una rempuesta fracasada a la yá tradicional tendencia del PP asturianu a l’amarraza interna. Tamién foi l’añu nel qu’Andecha Astur algamaba el so cumal de votos con más de 3.800 papeletes nel so favor. Una situación cásique marxinal que, col tiempu, diba amosase como l’aparentemente deseable pa un seutor relevante de les sos bases y cargos.

La sangría nel Pas diba siguir seliquino pero de contino nesos años, tamién no que se refier a una presencia nos conceyos que diba retroceder entá más nes eleiciones de 2007.

Esa convocatoria diba ser un puntu y a parte nel panorama políticu asturianista al abrise estratexes nueves que nun dieron resultaos inmediatos, pero que podríen converxer con éxitu nesta década a piques d’entamar.

D’una banda, axuntábense pela derecha lo que quedaba d’un Pas y una Uras cola idea de que sumando los votos algamaos por caúna d’elles en 2003 diben recuperar un escañu na Xunta Xeneral. Pero l’electoráu nun vio más que un intentu desesperáu y poco creíble a lo que ayudó enforma el cambéu de discursu del PP, muncho más sensible agora pa col arume rexonalista de los sos fíos pródigos.

Pela otra banda, l’intentu de xunión d’Ias y Andecha, los otros dos vértices de l’atomización de la esquierda nacionalista, acabó nun pleitu nunca esclariáu del too que sólo sirvió pa que rescamplara una vuelta más la incapacidá, o les poques ganes, de dellos seutores pa sacar alantre un proyeutu serio.

politicos

El resultáu d’aquella xuntanza a medies foi la recuperación de les sigles UNA p’abellugar a Izquierda Asturiana y Andecha Astur Suyúdice nun intentu de facer una propuesta mui asemeyada al Bloque por Asturies, pero sin estratexes de coalición con formaciones subsidiaries d’organizaciones estatales que comprometan los sos oxetivos políticos. Pel momentu, los errores y la debilidá organizativos vienen lastrando enforma la so actividá y el so desenvolvimientu na vida pública asturiana.

Lo cierto ye que, dende aquelles eleiciones, l’asturianismu políticu entró nun procesu de depresión con síntomes claros. Asina, énte les llamaes a la xuntanza y la bronca pesimista xeneralizada, Andecha vuelve a entamar un llamáu a la xunión de los asturianistes al que-y sigui el xuegu el Pas, d’un mou bien poco creible y de nula repercusión acullá del ruxideru cibernéticu. Pela so parte, la crisis interna n’Izquierda Xunida arrequexa al so seutor más asturianista y acaba cola dimisión d’un Valledor que nun dexó de falar de refundaciones y xuntances con mención esplítica a UNA. Nesi sentíu, y ya nes selmanes últimes de la década, la dimisión de Valledor abre la puerta de la Xunta Xeneral a la esquierda nacionalista na persona del secretariu xeneral del Bloque, Roberto Colunga, quien tamién dexa abierta la puerta a contautos con otres formaciones de cara a los comicios de 2011.

Sicasí, l’escenariu col qu’entama la década ye’l del enfotu nuna serie de previsibles movimientos que puean dar resulatos sólidos a mediu y llargu plazu. Con una militancia entá probe y una sopa de sigles y logos nes que s’atopen fórmules claramente fracasaes y otres con un recorríu posible, dende’l próximu 1 de xineru lo mesmo podemos tar énte l’aniciu d’un nuevu momentu históricu pa un asturianismu que, d’una vez, tien de dexar de perder trenes.

7 pensamientos en “¿Alón a la década de la travesía pel desiertu?”

  1. Too esto que cuntes tien una igua clara: Un sólu partíu nacionaliegu.
    Somos 4 gatos y encima dixebrámonos en X partíos. Deberíen desaniciase toos y criar un fuerte, a fin de cuentes, tolos partíos y tolos votantes queremos lo mesmo.

  2. El nacionalismu asturianu nun esiste, toa esa xente nun son más que xente que se diz de “izquierdes”, filocastristes, leninistes, autoritarios, misántropos o bien son simplemente incapaces, inorantes, oportunistes o figurones, que de too hai. Toos esos de la semeya nun valen pa ná. Lo del nacionalismu asturianu ye una cosa que ta por ver si una d’estes xeneraciones sal un nacionalismu. Pero lo d’esta xente nun ye nacionalismu ye una presunción y por ello nun los voten nin siquiera los poquísimos nacionalistes que sí qu’hai n’Asturies. Pero pasa al revés qu’en Cataluña: que la xente ye más nacionalista qu’estos que se dicen “políticos nacionalistes” y nun son mas que simples provincianos que nun encaxen en nengún otru partíu español al usu y que por ello se consideren ellos mesmos baxo la marca de “nacionalistes” ensin selo realmente.

  3. Qué tal, si en llugar de despotricar facemos dalgo constructivo?

    11 renglones, que dende’l primeru al onceavu, nun construyen res. Yo, como militante d’un partíu, toi desixéndo-yos a los mios representantes más esfuerciu xunificador. Prestaríame saber que tú tas faciendo lo mesmo, collaciu. Tantu aldericar, y facemos política dende casa, cuando lo que tien que haber ye un representante nel parllamentu.

    Dende casa, nun se faen les coses. Desíxe-yos a los tos representantes l’entendimientu col restu les fuercies. Mientres discutimos ente nós, faen política otros por nós y asina nos va.

    Xuntanza. Eso ye lo que quiero del mio partíu. Xuntanza, coaliciones, y menos preocupase de si seré yo l’elexíu. Xuntanza, que tamos morriendo adulces…

  4. …y otra cosa:

    Nun voto al BIA, pero nun tendría DENGÚN problema en facelo. Polo menos faen una política que me presta más que la que faen los que agora mesmo toi votando. ¿Sabes qué ye lo que faen los que agora mesmo toi votando? Tán sentaos nel sofá de casa, discutiendo colos d’enfrente, que tamién tán en casa.

    Prefiero lo que fai el BIA, porque lo que quiero son resultaos.

    Y si a los que toi votando nun-yos da la tiesta pa calletriar lo que-yos tamos diciendo, igual el mio votu, va pa dalguien como’l BIA, que tienen el mio respetu. Polo menos FAEN, que ye lo importante. Y magar que me duela, faen más que los míos.

    …que yá va siendo hora. Que tamos acabantes de perder otros 10 años. ¿Cuántu más creéis que vamos siguir aguantando les vuestres tonteríes y la vuesa tendencia a separtar cada vegada más l’asturianismu? Hai de construyir. Impórtame una mierda, el leninismu, marxocastrismu, filopoyismu o coyoncinismu col que s’acusen/acusáis unos a otros. Lo que quier ver el votante ye RESULTAOS, y no, ver cómo los sos representantes siguen engarriándose ente ellos. (Igual ye cosa de que tolos partíos miren pal so embeligru, y dexen pasu a otra xente que pueda llevar les coses meyor, con más sentimientu unitariu. Que ya nos ficieron perder 10 años)

    Pretendo ser mui constructivu, la verdá. Dexái de pelear y ponéivos a falar de lo que nos xune.

  5. Una mui bona repasada.

    “l’escenariu col qu’entama la década ye’l del enfotu nuna serie de previsibles movimientos que puean dar resulatos sólidos a mediu y llargu plazu.”

    Nun soi tan optimista. Veo a muncha xente mui trancao tovía dientro los sos partíos. Veo tovía muncha rocea, munchu aisllamientu -hasta de la militancia-, muncha xente que nun ye aceptar que sólo nun va facer nada. La pallabra “xuntanza”, que tanto movemos pela rede, ye tabú dafechu en dellos noyos de decisión y militancia, y mírase pa los movimientos de Valledor con llercia -porque faiga de verdá lo que dixo que quería facer- o con risión -“unu menos”-. Pa mio idea, esos movimientos qu’albidráis nun van emprimar hasta qu’haya un sustu pergrande, hasta que se dean de focicu -otra vez- cola realidá de les urnes. Y asina y too, veréislo, va haber xente que tovía quede suañando con ser “referente” del movimientu con 1.000 y picu votos nel fardel. Como ciudadanu, repúname tener otres eleiciones ehí a la vuelta y saber que voi tirar el votu una vez más. Y van 20 años. Si estes actitúes son cafiantes pal votante nacionalista, cómo coime suañen con caltriar nel restu la sociedá.

    Anguaño veo más cerca una refundación dende la base, tres d’un sapiazu gordu, o una refundación dende arriba (por una crisis n’IX o pol ésitu d’una propuesta nueva con un lliderazgu bonu y reconocible pola población) que’l que munchos de los “cabezaleros” espierten.

    Pero: si surde mañana un partíu con xente de perfil seriu y públicu, conocío pola población, que defenda curioso los dos finxos mínimos d’oficialidá y másimu autogobiernu, qu’espatuxe al altu la lleva énte l’argayu de la población mozo, el paru, les llaceries ecolóxiques, etc…, métese na Xunta Xeneral a la primera.

    Quédome coles pallabres de García Arias, usaes pa la oficialidá y escontra los partíos mayoritarios, pero que bien puen encuallar nel nacionalismu y pa colos propios partíos que lu representen.

    http://www.youtube.com/watch?v=ydv4asHAbrQ&#t=02m57s

  6. * “…métese na Xunta Xeneral a la primera”. (Falo, claro, d’un partíu que seya un bloque de concentración del votu y qu’inxerte a munchos de los qu’anguaño tán xebraos).

Leave a Reply

Your email address will not be published. Required fields are marked *

*