Xuntances perende acullá

N’esti primer día ensin reflexón dióme poles xuntances, polo precario de la situación d’un asturianismu víctima tanto, o más, d’errores propios como de torgues impuestes. Restolando un poco perhí, vese que’l casu asturianu nun ye únicu nel mundu, y que intentos, xuntances, cambeos d’estratexa, polémiques y ruíu son vezu en tolos movimientos minoritarios y alternativos. Los que a la fin algamen mayor ésitu, ye siempre depués de grandes fracasos y con munchos calabres pel camín. Pero sólo algamaron esi ésitu depués d’aneciar.

Sicasí, y polo que viera esta tarde d’aburrición, siempre hai dos elementos presentes nel espoxigue d’esos movimientos minoritarios: la xuntanza y/o los líderes carismáticos. Llúeu, esi espoxigue caltiénse o retrocede, y nello tien muncho aquel el texíu social, la fuercia que se-y dea a la organización, el ‘músculu’ del que munchos falen.

N’Asturies tamos nuna situación na que nun hai nada de too eso. La famosa Coalición Asturiana foi un finxu que munchos nin siquiera pudimos votar. Aquella xuntanza supunxo la entrada d’un nacionalista con carisma na Xunta Xeneral del Principáu, pero bien ceo les coses entamaron a esgonciase. La disolución de CA dio-y al Pas la oportunidá de reforzar la so cadarma organizativa, ganar músculu, dir convirtiéndose nel gran paraguón qu’abellugara a tol asturianismu. Pero nun foi quien a ello, y pa cuando apaeció Uras y el so rexonalismu descafeináu y oportunista, tola fuercia organizativa algamada pol Pas dilióse como un terronín de zucre.

Y ehí tamos, nuna travesía nel desiertu na que, na mio modesta opinión, entamárense dellos intentos de que l’asturianismu garre cuayu nel panorama políticu asturianu. Unu foi la estratexa del Bloque por Asturies, que d’una banda apurría-y el sellu asturianista a Izquierda Xunida, y d’otra permitía da-y visibilidá a un sector nacionalista que diba dir ganando esperiencia na política real, dalgo fundamental pa fortalecer mínimamente una organización. Ónde llevará esa esperiencia, esi enfotu n’enseñar ‘la patita’ del panorama políticu hexemónicu n’Asturies, magar toles incomprensiones, ye dalgo que ta por ver.

Como tamién ta por ver qué sal de otra estratexa distinta, muncho más difícil nos anicios, que pretende construir dende cero una alternativa política capaz de llegar a una bayura sectores identificaos col asturianismu d’esquierda. Pero esi intentu, primero na forma de coalición electoral Unidá, y lluéu como UNA, tien énte sí toles torgues d’una organización feble, qu’entá, en munchos sentíos, nun zarró el so procesu fundacional. Poro, ta tamién por ver qué pue salir d’elli, si espolleta, o si s’allanca na marxinalidá política de la que’n toos estos años nun foi a salir una de les sos formaciones d’orixen: Andecha Astur.

Sicasí, nenguna d’eses estratexes contenta les aspiraciones d’esi sector de la sociedá asturiana al qu’aspiren a representar políticamente. L’oxetivu tien de ser algamar representación y da-y valir a les esmoliciones de decenes de miles d’asturianos. Y va siendo hora d’ello.

¿Que una opción ye la xuntanza? Paez evidente. Pero lo cierto ye que ¿cómo se fai? Como dicía güei Trayasgaya, dos y dos nun son necesariamente cuatro en política. Vióse col resultáu d’Unión Asturianista nes pasaes autonómiques, y entá más claramente se vió nel casu de Coalición Andalucista. Esta candidatura electoral axuntaba por primer vez a tol espectro nacionalista/rexonalista andaluz: dende’l federalismu socialdemócrata del Partido Andalucista, al islamismu secesionista de Liberación Andaluza. Al final, con casi 124.000 votos quedóse a piques d’algamar representación nel parlamentu andaluz, pero nun entró.

Un casu llamativu ye tamién el de Valencia, con delles corrientes nacionalistes y rexonalistes, delles irreconciliables y mui influyíes, por estremaos motivos, pol catalanismu, que viven tamién anguañu momentos de probitú. Sicasí, la xuntanza presentada pa les autonómiques últimes pue ser l’espeyu nel que se mirara Francisco Javier García Valledor n’aquella propuesta suya de xuntanza pal próximu ochobre. Compromís pel País Valencià integraba d’aquella a Izquierda Xunida, el Bloc Nacionalista Valencià (de la ‘tercera vía’ del nacionalismu valencianu, non pan-catalanistes), dos partíos verdes y Izquierda Republicana. Algamaron seis diputaos (equiparable a los cuatro d’IU-BA-LV), pero lo heteroxéneu del esperimentu acabó en crisis y la escisión del grupu parlamentariu.

N’otros casos, les coaliciones y xuntances fáense y desfáense, pero paez que sólo algamen cierto ésitu cuando son quién a amosar ‘valor añadíu’ a la mera suma de fuerces. Nesti puntu xueguen munchu los líderes (Labordeta na Chunta Aragonesista, Beiras nel BNG) y la imaxe que tresmita la unión al so electoráu (Coalición Canaria, Nafarroa Bai).

De toles maneres, lo que de verdá nun funciona ye la dixebra. Un exemplu qu’esta tarde llamóme munchu l’atención, ye’l del partíu escocés Solidarity, fundáu por dos ex parlamentarios del Partíu Socialista Escocés. Anque nun algamaron escañu, el partíu nuevu triplicó los votos del orixinal. Eso sí, malapenes sumaron los dos 50.000 votos, cuando en 2003 algamaron cásique 130.000 y seis diputaos. El líder de Solidarity, Tommy Sheridan, tien munchu carisma, tantu, que paez que se pasó de vueltes y acabó nel Gran Hermano pa famosos de Gran Bretaña porque “necesitaba’l dineru”. Equí lu tenéis nun videu electoral, desplicando col so marcáu acentu el programa del so partíu.

http://www.youtube.com/watch?v=BJqCGXJZn0U

Y la cuestión ye ¿qué facer?, ¿quién s’axunta?, ¿cómo?, ¿con qué lideres?… ¿Qué xuntanza sedrá la que seya quién a algamar un bultable apoyu social, a ufrir una alternativa creible y viable, averada a la realidá asturiana, qu’ilusione y implique realmente a una parte importante de la sociedá?

13 pensamientos en “Xuntances perende acullá”

  1. Nesti analís hai una cuestión que nun valores. La situación llingüística n’Asturies y los posicionamientos, llóxicos, de los partidos nacionalistes énte ella. Habría que ver hasta que puntu l’usu dafechu de la llinga y dalgunes vegaes hasta la negación del castellán supón una torga pa llegar a muncha otra xente.

  2. Nenguna torga, H.artu. Ehí ta’l casu del PAS-URAS aplicando’l billingüismu. Los problemes d’asturianistes y nacionalistes nun van perhí.

  3. El problema nun ye de xuntances ye de falta d’ideoloxía nacionalista y de falta de rumbu y d’idees. Dicen ser toos nacionalistes pero nun lo son, son izquierdistes y puntu. Pa qué val un partíu que se diz nacionalista si al final van apoyar a IU o al psoe pa que nun gobierne’l centru derecha. ¿Pa que val un aprtíu que se diz nacionalista si lo único que tien en mente ye la provincia d’Uviéu y non la nación asturiana? pa qué queremos votar a unos par´tios socialistes o comunistes de Fidel Castro si l’electoráu somos más nacionalistes qu’ellos mesmos qu’anden ahí cola so llucha de clases… ¿cuando se vio qu’un partíu nacionalista asturiana pida comsumir productos nacionales o apoyar empreses asturianes? nunca.

  4. Hai muncho despiste nestos comentarios, siento dicilo. Ser d´esquierda nun ye incompatible con lluchar pol xorrecimientu d´una pequeña y mediana empresa que dea autosuficiencia al País. Eso fai muncho dañu a los planes del Gran capitalismu, ¿qué queríais? ¿defender koljoses o sistemes estalinistes?
    Y ¿cómo ser nacionalista asturianu ensin defender y usar la llingua? Otra cosa ye obsesionase cola tema de la llingua namái.

  5. El problema de la izquierda nacionalista asturiana nun ye la xuntanza o non. Eso ye na mas qu’una torga coyuntural. El problema ye la so falta de pragmatismu, la so falta de faer politica, la so falta de tar nai cai, de participar de la vida municipal na oposición (pa eso nun fai falta tener conceyales).
    El problema ye qu’hai demasiau discursu nacionaliegu, demasiaos topicos al altu la lleba y mui poca actividá real, no nacional, pero principalmente no llocal que ye onde cala’l discursu. Si nun te mueves, si nun te dexes ver, siguiras siendo un estrañu pa la sociedá que pueda compartir la to forma de ver les coses. Pero nun esistimos namas que como los raros pal restu la sociedá. Porque tendemos al guettu, a la corripia, a enzarramos nos mesmos chigres a aldericar ente los mesmos y a nun faer politica real, sinon a xugar a los nacionalistes.

    Y xurxu. Tienes tola razón. El problema ye de falta d’idioloxia nacionalista. Pero pa tí. Pa mi el nacionalismu ye un puntu coyuntural, porque el nacionalsimu namas ye una idioloxia dende’l puntu de vista facista. Dende el puntu de vista d’una persona d’izquerdes plantegase como nacionalista ye debioal fechu coyuntural de qu’anguañu nun ye respetau como pueblu, nin les sos señes, nin los sos drechos. Pero una vez conseguio eso l’adxetivu de nacionalista apaez porque ya ta conseguio. Ensin embargo tu plantegues el nacionalismo como idioloxía. Eso pa ti y pal PP pal PNV pa CiU, pa LE Pen, pa los de Democracia Nacional, pa Berlusconi… toos esos son nacionalistes, ca un nel so ambitu de nación, pero estremense poco de lo que tu comentes.

    salú!

  6. Toi totalmente d’alcuerdu con “nomenon”, la idioloxía ye izquierda, drecha, socialdemócrata, comunista… etc. El nacionalismu ye daqué coyuntural, como l’ecoloxísmu, les polítiques non sexistes y otros munchos trazos. Asturies necesita una política nacionalista qu’asitie la so condición de nación n’Europa y nel mundiu; pero una vegada algamao, hai de siguir viviendo y faciendo política y caltener la “idioloxía” del nacionalismu ye cayer nel facismu.

    Otra cosa que me paez perimportante, anguaño n’Asturies guetar cabezaleros carismáticos ye una pérdiga de tiempu bultable, pos nun los hai entá. Hai de facelos, nos partíos, faciendo política. Desendolcar una política d’averamientu a la sociedá, denunciar toles llamuergues qu’hai nos estremaos conceyos, y llueu nel conxuntu de la nación. Ver, defender y facer ver que la nación de nueso nun fina nel Payares… etc. Munchu que facer y mui pocu tiempu. La xuntanza vendrá, toi seguru dafechu. Si entá nun se pue cuntar con una xuntanza política y qu’haya un únicu partíu que mos xuncie a toos, nun pasa ren; siempres qu’haya llugares d’aición en comuña onde toos trabayemos n’andecha (Sofitu, L’Ensame Pola República Asturiana, CSI… etc.) . Si algamamos eso, la xunción vendrá de so de xuru.

    Un saludu a toos!

  7. Panada toi d´alcuerdu con que´l nacionalismu sosteníu ye facismu nel llímite. Pero ¿qué decimos? Hai qu´estremar el nacionalismu español, el del Estáu, que cuenta col exércitu y la guardia civil, del nacionalismu d´un pueblu oprimíu, pequeñu, escaecíu, colonizáu. Y ser nacionalista ye defender los derechos coleutivos d´un Pueblu que por motivos demográficos, territoriales, económicos, etc. siempre va tar baxo amenaza. Asturies, inda una Asturies independiente, tien de ser nacionalista énte les amenaces, que nun-y van faltar. Por favor, por favor, nótase qu´hai “izquierdismu difusu” nel País, pero pocu nacionalismu.

  8. Carlos, Asturies necesita y munchu’l nacionalismu. Asturies ha ser nacionalista y defendese de los ataques que-y unvíen, ha ser nacionalista y saber vender la so cultura al restu’l mundiu, ha ser nacionalista y saber caltener la so llingua…etc. Pero, ha perder esi nacionalismu y saber aceutar a la xente foriato que-y llega tolos díes, ha perder esi nacionalismu ya intregalos n’ella como otros asturianos más, porque sinón sedríemos unos racistes y xenófobos. Y eso ye facismu. ¿Qué estremandica hai ente lo que fexeron los Nazis a los xudíos y que tán faciendo ellos a los Palestinos? Denguna, too ye nacionalismu radicalizáu, lleváu a la llende, too ye xenocidiu. Y polo menos yo nun quiero cayer n’ello.

    Nacionalismu sí, pero tamién hai de saber cuándo y cómo.

  9. El nacionalismu ye una ideoloxía como una catedral. Pero nun hai “un nacionalismu”, sinón varies maneres de plasmar esi nacionalismu. Un nacionalista asturianu d’izquierda nun ye homologable a un nacionalista español d’izquierda. Son opuestos. El nacionalismu burgués nun ye homologable al nacionalismu revolucionariu (había hai bien d’años un llibrín pámeque de Ricardo Carpani qu’estremaba perfechamente dambos). Un nacionalista nun se convierte nun facista xusto al trespasar la raya d’algamar la independencia nacional. O yera un facista antes o nun tien por qué lo ser dempués. A una nación hai que la defender siempre anque seya independiente, polo que siempre va haber nacionalistes. Yo opino que quien considere que’l nacionalismu ye dalgo “coyuntural” nun ye nacionalista, ye otra cosa totalmente respetable pero distinta. Y a lo meyor ta ehí una de les causes poles que’l nacionalismu n’Asturies nun espolleta. Porque realmente’l discursu que se tresllada a la población ye un discursu más “d’izquierdes” ente una porretada d’ellos que yá conoz, pero non un discursu “nacionalista”. Yo soi nacionalista y al que-y paeza que por ello soi un facista en potencia, pues nun me molesta un res. Quede claro.

  10. Yo toi col Xanu. Hai nacionalismos y nacionalismos. Y ser nacionalista nun significa refugar a los emigrantes o ser xenófobu. Pero ¿dende cuándo? Pero si los que son racistes son los españoles pa colos asturianos !!! (víase´l racismu llingüísticu). Lluchar por un pueblu oprimíu ye lluchar por una humanidá llibre, escomenzando pola humanidá de los más averaos, los de to nación. ¿Qué ye eso de ponese la vienda antes de sofrir la firía?

  11. Toi col xanu, y con Carlos. El nacionalismu ye escluyente pa con otros modelos de nación. El asturianu ye escluyente pa col español, y el gallegu, si m’apures, pa col asturianu, pero nun compartir un modelu de nación nun ye fascismu. Otra cosa ye cómo s’empobine políticamente esi nacionalismu. Paezme interesante el casu británicu, onde el nacionalismu inglés (que non británicu) ye de dereches o d’estrema derecha, y el de Gales, Irlanda y Escocia ye mayoritariamente d’esquierda o centru esquierda. Nun soi un politólogu, pero cuido qu’una cosa ye tener claro el marcu nacional, qué ye la to nación, el to país, y otra qué ye lo qu’aspires pa elli, pa los sos nacionales y pal restu’l mundu.

  12. Dais-vos cuenta de que llevamos na xenetica el gustu por complicar les coses o salinos del tema?
    Basta ver per onde entamo`l discutiniu y como foi cambiando.
    Nun se si la pallabra ye nacionalismu o non, pero, pa mi, los partios nacionalistes n`asturies son mas d`izquierdes que “asturianos”.
    Lo m`abulta mas afayaizu que nacionalistes. ( Con too sigo pensando que son mas d`izquierdes que nacionalistes).
    Yo voi pa 40 años, y ya tengo per claro que nun vamos tocar pelo na puñetera vida. Y digo-vos porque.
    Somos vergoñosamente incapaces de simplificar les coses; ver lo que queremos, y ver lo que tenemos.
    Lo que tenemos ye un panorama cada añu mas complicau p`algamar representación na xunta. ( Nes prosimes elecciones con UPyD va ser entá mas dificil porque cuento que va poner el escañu en mas votos).
    Lo que tenemos ye, (nel meyor de los casos) 20.000 votos. Ye asi o non?.
    A mi dame que pa les prosimes autonomiques, igual nin con 20.000 votos hai escañu.
    Poro, nel casu de tener la meyor piesca de que somos capaces (1 diputau), nun parer que vaya ser muy importante si esi diputau ye d`izquierdes, o marxista, o de centru … Porque pasarien munchos años hasta tener ente les manos ferramientes polítiques pa exercer de tales.
    Y como dalgún me retrucará nesti tema apunto lo siguiente;
    Llegau el diputau, el primer cepu que habia qu`esquivar ye nun da-y el gobiernu a naide, nin pautar pa la lexislatura con naide. Esi erru vivilu nel Pas, y quiera dios que nun seamos tan burros como pa volver de focicu a la misma piedra.
    Polo tanto, nun tendríemos posibilida nengua d`exercer de forma trascendente nin d`izquierdes nin de dereches.
    Esto ye lo que pienso yo, y muuuunchos de los votantes.
    Agora a ver quien ye`l guapu que convence a Pas, Andecha, y Una. Porque cada un va decite que tien los sos “principios”, les sos “idees” y que ye`l “referente”.
    Dexo fuera IU porque demostró a les clares que los sos intereses son otros ( nos que val mas nun entrar por nun faltar), y Bloque por Asturies porque tovia toy intentando entender que coyones fai esi chaval a vueltes pol mundu que mas que`l unicu “diputau nacionalista” de la xunta, parez el hermanu de Marichalar mangau na moto d`agua.
    Lo mas coyonudo ye que dexamos pasar unos años bien guapos, y que cada vez ta mas complicao. Hasta`l puntu que xuntandose toos ya nun se podría asegurar algamar esi escañu.
    Son munchos años con esti cantar y yo véolo …. imposible.

  13. Dos y dos nun son cuatro, pero anda que nun diba dar xuegu un diputáu esquierdista/nacionalista. L’autoestima del asturianismu diba ser otra, y la capacidá de facese ver como opción, y al tiempu capacidá pa mover discursos anguañu llancaos en posiciones cavernícoles. Eso sí, yo nun diría imposible, porque traxectories similares hailes a embute, pero va costar entrar na Xunta Xeneral nes eleiciones, estes no, les de 2015.

Leave a Reply

Your email address will not be published. Required fields are marked *

*