Unidá ta acabante d’entamar la campaña con un cartelu nel que, claramente, asemeya l’estilu d’Ubuntu, esa distribución de GNU-Linux tan prestosa y que tantes alegríes vien dando dende unos años p’acá. Dalgunos podríen dicir que ye dafechu un plaxu, pero quiciaves ye más reflexu del apueste pol Software Llibre que, dicen, faen dende la coalición. Pal que nun tea avezáu a les campañes d’Ubuntu, dexámosvos darréu ún de los exemplos más espardíos, asína como una nota aclaratoria sobre’l sofitu d’esti web a Unidá.
El cartelu d’enriba, lóxico, ye’l d’Ubuntu. Y esti el ‘oficial’ d’Unidá:
No tocante al nuesu sofitu a Unidá, tenemos que dicir que non, nun pertenecemos nin a Andecha, nin a Ias, nin a Los Verdes-Grupu Verde, como mos tienen entrugáu pel corréu. Namás decidimos espresar el nuesu sofitu a esa candidatura pol fechu de que mos paez l’alternativa más averada a lo que mos prestaría que fuera Asturies, y porque pensamos que namás col fechu de que sacara un diputáu, magar que ye perdíficil qu’algame 18.000 votos, sedría’l mayor castigu que se-y pudiera dar a la izquierda combayona y al establishment del gordu (Nun escaecer que foi IU-BA-LV quien impuganara teles sos llistes). Ta dicho.