Na acordanza. Xavi Vilareyo.

vilareyo

Y, de sópitu, enterámonos de que Xaviel Vilareyo y Villamil morriera. Nun lu conocíemos personalmente, pero sentímos la so ausencia al momentu. Dímonos cuenta entós de que yera, de manera dala, parte de nós, daquién al que-y garráramos un ciñu especial polo qu’escribía, polo que dicía, por cómo se vistía y polo que tresmitía.

De Xavi Vilareyo teníamos una imaxe construyía por él mesmu al traviés d’internet, los sos llibros y les sos intervenciones en Radio Sele. Y yera la imaxe d’un tipu intelixente, célebre, con una mui particular retranca y, sobre too, la imaxe d’un home llibre que facía lo que tenía que facer y dicía lo que tenía que dicir, porque daquién lo tenía que dicir.

Yera un unabomber intelectual, ensayista de combate y heterodoxu compulsivu. Llevó el ‘do it yourself’ a niveles non siempre comprendíos pero que poníen en evidencia el valir de la voluntá pa facer lo que ún siente que tien que facer.

Topemos esta mañana el so ‘Los ámbitos de la nación asturiana’ ente la ‘Gomorra’ de Sabiano y ‘La Bufanda’ de David Artime. Ye un llibru de probe edición y discutible en munchos aspeutos. Ye un panfletu nacionalista, pero daquién tenía qu’escribilu nesi universu asturianista faltu de panfletos y enllenu de ‘rigor científicu’, y él púnxose a facelu, y lo fizo, como inventara el Festival de Cine Asturianu o el de Cine LGTB d’Asturies, y los caltuviera vivos.

Facía falta Xavi Vilareyo, facíanos falta, y tovía esperábemos muncho d’él. Marchósenos bien ceo.