Asturlinux y como fui a instalar Debian

D’un tiempu a esta parte vengo sintiendo crítiques dirixíes a Asturlinux, tachándolos de forma totalmente gratuita de nun facer nada. Sentí demasiaes veces la yá tristemente famosa frase de “Ye que faen unes xornaes de Software Llibre al añu y nada más”.

Yo yá empiezo a tar fartu de sentir estos argumentos vacios y qu’amuesen un desconocimientu total del trabayu desendolcáu por Asturlinux. Lo peor de too ye que normalmente estos comentarios vienen de xente que tan en casa ensin facer nada y que seríen capaces d’iguar tolos problemes del mundu… pero ye que nun tienen tiempu…

Puede que tengamos munches coses que criticar a Asturlinux, al fin y al cabo les asociaciones llévenles persones que, como toos, nun son perfectes. Pero de lo que quiero falar ye de la mio esperiencia personal con Asturlinux (y nun soi nin fui sociu).

Cuando por fín entró en mio casa un modem de 56 kb y pude coneutame a internet, pude lleer sobre GNU/Linux muncho más comodamente y más tiempu que los pocos ratos que podía parar nel cibercafé que taba delantre’l Lord Byron d’Avilés, y restolando pela rede acabes dando con Asturlinux, una asociación d’usuarios asturianos d’esti sistema que tanto me llamaba l’atención, tanto técnicamente,  como pol so sentíu éticu. Soscribime a la llista de corréu, y nun participé hasta que depués de tanto sentir les bondaes de “LA DISTRIBUCIÓN” la famosa Debian, entrugué si daquién yera a facilitame una copia d’esta distribución. Hasta entonces namás que fui a faceme con dalguna copia de revistes espcializaes (Mandrake, Suse y Red Hat) y la idea de baxar 5 CD col mio modem de 56 kb nun yera mui alentadora. En dos díes quedé con un sociu d’Asturlinux (creo que foi wikier, sicasí nun toi seguru) na estación de tren d’Uviéu y a cambiu de 5 cd virxenes conseguí una copia de Debian Potato (sería l’añu 2001), foi’l primeru d’un montón de problemes que m’aidaríen a resolver dende la, al mio entender, histórica asociación. Gracies a ellos conseguí echar a  andar per primer vegada el wifi del mio ibook en Debian ppc, o entendí lo que yera un script de shell… en gran midida son “culpables” de qu’agora yo seya un activista del Software Llibre…

Puede que de cara a la galería namás que ficieran unes xornaes (más qu’interesantes por cierto), pero lo cierto ye qu’Asturlinux contribuyó y contribuye a la difusión del Software Llibre n’Asturies como naide lo fizo hasta agora, yo personalmente como usuariu de GNU quiero dar les gracies a Asturlinux pol so llabor nestos 12 años.

La ética del Software Llibre

Cuando falamos de Software Llibre frente al privativu tendemos a facer comparances téuniques, si Winbug$ ye una ponzoña, que si Mac O$ X ye mui “cool”, que si GNU ye o non dificil de remanar… pero solemos dexar de lláu (paezme que cada vez más) el sentíu éticu/ideolóxicu del movimientu.

Y ye precisamente esti aspeutu, al mio entender, l’interesante del Software Llibre, “ye qu’en Windows puedo xugar al Sims” ¿pero a qué preciu?, cuido que  ye importantísimu pal desenrrollu d’una sociedá crear una cultura del conocimientu y esto incluye  a la teunoloxía. Una vegada sentí a una moza dicir que “El software privativu ye a la sociedá del conocimientu, como el patriarcáu a la sociedá igualitaria”, y cuido que nun puede tar más acertada. El software privativu atesora el conocimientu y restrinxe les llibertaes de compartilu, d’estudialu y ameyoralu. Agora imaxina que’l inventor de la fabada nun compartiere la forma de preparala, y te prohibiere compartila col vecín porque namás que tienes permisu a tastiala, pero la fabada ye namái que del inventor y tú nun puedes modificala (adiós a les fabes con amasueles). Suena rídiculo ¿verdá? pues esto ye lo que pasa col software privativu.

Nun tamos falando de que quien desendolque software nun cobre por ello, sinon de que nun torgue l’accesu a “la receta”, a compartilu. El propiu Richard Stallman vivió de mercar copies d’Emacs.

Por eso anque téunicamente un software privativu seya meyor qu’ún llibre hai de refugar el so usu, porque falamos de llibertá y cuido que’l principiu de la llibertá ta (o debería tar) perriba la téunica.

Esti aspeutu de la llibertá ye mui claru con proyeutos de llocalización como l’asturianu, el tener accesu a una teunoloxía llibre permítenos modificala pa usala na llingua que nos pete. Hai unos meses coincidimos dalgunos miembros de Softastur con una académica de la Llingua, y mientres esplicávemos les distintes funcionalidaes d’Ubuntu interrumpiónos diciendo: “Nun me vender la moto, como si ye peor que lo que tengo, si ta n’asturianu ye lo que tengo d’usar por principios”, esti mesmu principiu éticu ye comparable al del Software Llibre. Tengo d’usalu porque ye éticu, y non porque seya meyor y/o de baldre.

Cuando falamos de Software Llibre falamos de sostenibilidá de verdá, munchos paises con pocos recursos tan consiguiendo informatizase y frayar la famosa “brecha dixital” gracies al Software Llibre, y ye que quiciabes esti movimientu -que xurde nos paises del primer mundu, principalmente colos proyeutos GNU n’EE.XX y Linux en Finlandia-, suponga la mayor tresferencia de propiedá intelectual de los grandes paises industrializaos al tercer mundu.

Otru aspeutu importante ye que nel Software Llibre munchos proyeutos apuesten por plataformes obsoletes (pa dalgunos) y minoritaries, colo que la llibertá yá nun ta namái que nel software, sinon nel hardware. Por poner un exemplu, toi escribiendo esti artículu dende un equipu que nun tien recursos suficientes pa correr Windows XP, esto implicaría que va años que o desfacíame d’él (normalmente pa la basura) o taría usando un Windows 98 ensin soporte nin aplicaciones nueves… pero gracies al Software Llibre (concretamente a Debian GNU/Linux) tengo un entornu  de trabayu agradable y modernu, puede que nun tenga “sombres espectaculares” nos iconos del escritoriu, pero puedo vivir ensin elles…

El poder estirar la vida de los equipos d’esta forma (aparte del aforru económicu) supón un amenorgue considerable de la basura que xeneramos, si tas a la escontra de que nos llanten una incineradora de basura n’Asturies… Software Llibre… ;P

Si esti sistema de reutilización (reutiliza enantes de reciclar) treslladamoslu a l’Alministración y organismos públicos, falamos de munchos millones d’euros… igual los suficientes como pa nun tener que facer recortes sociales nin a trabayadores, y nun ye una grandonada mia: La propia Microsoft, fala de que’l so volume de negociu n’España ye de 3.600 millones d’€uros, el principal cliente de Microsoft n’España ye l’Estáu y les comunidaes autónomes (sacante esceiciones como Extremadura y Andalucia), que pa comparar destinen un total de 3.209 millones a la educación… y con esto falamos namás que de software y non de tol hardware qu’hai que cambiar pa que pueda mover Windows 7…

Si crees que’l conocimientu tien de compartise pa progresar y ser una sociedá innovadora, si quies vivir n’asturianu, si yes verde o si te da perceguera’l consumismu nel que nos quieren meter les grandes multinacionales, usa Software Llibre, porque ye éticu.

Déxovos un videu d’una conferencia de Richard Stallman onde esplica los conceptos éticos del Software Llibre (castellanu):

Richard Stallman en Buenos Aires