Si dalgo va camín de tar normalizáu n’Asturies ye’l puteríu. De va unos años p’acá les cases de putes tan desenvolviendo adulces un procesu que va camín de convertise nun auténticu fechu diferencial asturianu. El puteríu ya ta na vida de los asturianos, ta presente en cualisquier requexu y tien un espaciu, pagáu eso si, enforma más importante nos medios de comunicación del país qu’otres cuestiones como la lliteratura n’asturianu o la investigación científica. Equí vamos tratar d’esplicar un fenómenu que bien puede valir como exemplu pa otres estayes de la sociedá asturiana.
Los oríxenes
L’aniciu de la normalización social del puteríu vien de lo cabero los años 80. Entós, la casa de cites Daniela dio un pasu alantre saltando de les páxines de contautos de la prensa rexonal pa pasar a patrocinar informaciones deportives. Los resultaos del Sporting diben acompañaos del teléfonu de mulates y los del Uviéu, d’eslaves de cadriles bamboleantes, por poner un exemplu.
Daniela afitó les bases pa lo que, na metá de los 90, foi l’espoxigue de la publicidá puteril n’Asturies y, con ello, la normalización de les tetes con estrelles nos pezones na prensa.
(Anuncia del Horóscopo na seición de pasatiempos d’El Comercio.
La Sala de Fiestas Horóscopo marcó un antes y un depués nos medios de comunicación asturianos al patrocinar, los vienres pela nueche, el porno de Telegijón.
(Goyo Ramos interpreta “Poner Telegijón)
La valoratible audiencia d’estes emisiones dio-y al llocal xixonés una popularidá compatible a la que lluéu-y vendría, ensin querer, al traviés del confidente Lavandera, el del 11-M.
Los motivos
Pero la robla d’alcuerdos ente dinamiteros nun ye’l motivu únicu de la normalización del puteríu. Les cases de putes son anguaño auténticos templos onde, amás de calcala, s’afiten contratos inmobiliarios y políticos, onde se cellebren licitaciones con gayola y viagra. Güei, el puteríu (seya na so forma de casa putes, pisos o escorts) ta enforma asumíu, tien un prestixu social ente la clas dominante del país que tien reemplazáu dafechu al fenómenu tan español de ‘la querida’. El puteríu permite casique la misma gochería, pero ensin pone-y un pisu a naide.
D’otra manera, esiste un puteríu de mases, perestendíu, y que tien el so reflexu n’esi cogollín del consumu que ye’l centru d’Asturies (parque principáu y redolada). N’esa zona, les valles publicitaries del Olivo o l’Elvis, o los moteles de polvo discretu, conviven con toa naturalidá colos anuncios de la Renault, el Merkamueble, el Burger King o’l Ikea. Au hai consumu, hai gastu, y au hai perres, hai puteríu.
N’esti puntu, no que cinca al espoxigue del puteríu, entra’n xuegu un puntu común colos grandes centros comerciales: el poder adquisitivu. Ye sabío que n’Asturies diose nos años últimos un nuevu fenómenu social, el prexubilarismu. Son polo más paisanos de más de 45 años, ociosos y con perres en bolsu: el cliente “target” d’una casa putes. Del ociu al viciu hai namás trés pasos: los mesmos que dende’l coche a la puerta del club.
Esti aspeutu fai qu’el puteríu tenga una masa de clientes potenciales n’Asturies proporcionalmente mayor a la de cualquier otra zona d’España. Ye campu abonáu pa l’apertura de nuevos locales, colo que llega la competencia, y con ello el mayor esfuerzu económicu d’estes empreses en publicidá.
¿Quién gana? Los periódicos. La facturación pola publicidá puteril tien xorrecío hasta cifres de récord. Como exemplu: una guía sobre empreses relacionaes coles bodes val d’escusa pa que un puticlub anuncie les sos despidíes de solteru.
Nos sos anuncios, les cases de putes compiten en desatar la pasión del potencial cliente, que lleerá’l periódicu nel conseyu d’alministración o nel chigre, col resto prexubilaos (los mileuristes, polo xeneral, nun fain munchu gastu nestes cuestiones, nun tan en condiciones d’enxertase nel mercáu ‘diana’ del sector).
El futuru
El futuru nun mos puede traer más qu’un xorrecimientu d’esti seutor. Basta mirar les pintes de dellos cabezaleros del mundu de la empresa y la política asturiana pa imaxinalos col coldu afitáu na barra d’un club, o iguando alcuerdo sobre la entrada de moces nueves.
Entá güei el puteríu n’Asturies nun saltó a la política, como fixera el xefe de la patronal española de les cases de putes al través de la plataforma patriótica, social y populista España 2000. Pero al tiempu.
Poro, ye d’esperar que la presencia d’esti seutor fundamental de la economía tapecía astur será entá más abierta y evidente. Si ya s’anuncien nes páxines más cares de la prensa asturiana, nun tardaremos en ver a conseyeros del Principáu inaugurando los clubs más rellumantes del país.
Si los políticos inauguren casinos, y parquesastures porque nun diban inauguran macroputis, anque quiciabes nun podríen llenase la boca cola cantidá de trabayu que xeneraría, ya que nun se-y pasa a naide pola cabeza que la so fia acabe trabayando de puta, pa eso hai tantes inmigrantes pa esplotales bien… total como nun son d’equí… ¿nun ye eso?