Les sociedaes avancen, anque nun lo paeza

segregation_1938b

Esti rapacín que’n 1938 bebía augua n’una fonte pa negros en Carolina del Norte, lo mesmo ve agora argullosu cómo Estaos Uníos escueye un presidente ‘colored’. Poco antes de que yo naciera, na agonía de Franco, mio ma tuvo que dexar el so puestu de trabayu nuna empresa pública porque se casaba. Yera lo obligao: o solterones, o pa casa. Pasó un tiempín hasta que la llei-y reconociera la so capacidá pa viaxar fuera d’España ensin el permisu paternu o del so home. Agora, sigui lluchando pola oficialidá del asturianu.

Ta visto que, pel momentu, los líderes políticos y d’opinión del país nun tan pola reconocencia de res pal asturianu. Los argumentos de PSOE o PP contra la decisión de dellos conceyos de valorar los conocimientos de llingua nes prebes d’empleu municipal son un mecigayu de miéu ya inorancia. Polo xeneral afítense na supuesta discriminación que diba suponer pa los que nun saben res d’asturianu, que ye’l mesmu razonamientu qu’emplega siempre quien discrimina sistemáticamente dende’l poder. (Ver la ‘Historia de Sudáfrica’ de Faustino Zapico). El más orixinal y gayasperu foi, como ye vezu, Joaquín Aréstegui. El cabezaleru del PP faló de que la midía ‘ruempe la unidá de mercáu’… ¿de qué mercáu?, ¿del européu?, ¿del ibéricu?, ¿del del Fontán? ¿Y la obligación de conocer cómo furrula un procesador de textos d’una determinada marca, d’un determináu sistema operativu? ¿Eso nun ruempe la unidá de mercáu?

El casu ye que esto nun ye’l fin. Ye un pasu más. Ta claro que nun cuerren bonos tiempos pa la lírica. Pero ye que hai muncha crisis y tol mundu tien munchu miéu, porque cuantu más arriba tas, más grande va ser la hostia al cayer. Y hailos que ya gomiten del vértigu que tienen: ¿nun visteis a Areces falando d’ecoloxismu y ampliación de El Musel? pártome.

Un pensamientu en “Les sociedaes avancen, anque nun lo paeza”

  1. Tuvi ayeri na manifestación. Dióme la impresión de que taben los que siempre van tar hasta que los lleve la güestia. Nun voi entrar nel tema de les cifres d’asistencia, pero nel contestu del trabayu que lleva anguaño sacar a la xente a la cai, que nun fore de muncha participación entra dientro de la tónica xeneral.
    Hai un abandonu descaráu per parte de los sectores de la izquierda y derecha estatales que chisgaron el güeyu a la llingua hai tiempu a ver qué pescaben y eso nótase.
    Lo importante ye tener claro qu’hai que siguir movilizándose y lluchando.
    Efectivamente, ye un pasu más. Y tovía nos queden munchos que dar.

Leave a Reply

Your email address will not be published. Required fields are marked *

*