La xuntanza me pone

Ta acabante d’espublizase una bona iniciativa de xente esmolecío pola ruina realidá del nacionalismu asturianu y que cuiden, como casi toos, que la xuntanza de les fuerces asturianes ye imprescindible. Como diría el gran estadista cántabru, o de les Asturies de Santillana, según se mire, a nós la xuntanza tamién ‘nos pone’.

Pero lo que nun acabo de pillar ye porqué, si los promotores del web reconocen esplícitamente qu’hai más fuerces susceptibles de xuntanza, la cosa queda llendada a UNA y Andecha. De mano, una hipotética xunión de dambes sigles nun diba tener mayor aquél, pero ye que además paez la menos ‘operativa’. Sin saber de lo que pasara va un par d’añinos más que lo que trescendió públicamente, quien anguaño fai usu de la marca Andecha Astur ye precisamente quien nun quixo ‘axuntase’ a IAS pa formar Unidá, güei UNA, nuna patética llucha de ¿poder? que de fechu entá paez que ta nos tribunales. Dende esi puntu de vista, paez que hai una xente con voluntá de xuntanza, y otra, mui esmolecida pol autodetermín d’Asturies y la falta d’ambulancies en Noreña, pero que la xuntanza-yos dexa más bien frío. Sicasí, too pue intentase. De fechu, podría incluso considerase too un xestu qu’Andecha emitiera un escritu d’apoyu a UNA cinco díes depués de qu’españara tol tema de los avales pa les europees.

D’otra manera, nun veo porqué non abrir la ‘xuntanza’ a toles fuerces polítiques y colectivos. De verdá, y siempre como meros observadores d’esti requexu políticu qu’aspira a ser minoritariu en cuenta de marxinal, paez muncho más probable una collaboración UNA-Bloque por Asturies qu’amás resultara atractiva pa xente de la órbita del PAS y pa toos aquellos cansaos de dase testerazos contra una muria. Taría bien recuperar a toa esa xente, enantes de qu’acaben toos de conceyales de Cultura de Gabino.

Sicasí, tolos meyores deseos pa una iniciativa como la de Pola Xuntanza, y pa toes aquelles que puxen pol bon xacíu de les formaciones polítiques asturianes. Ye mui importante el debate, abiertu, tolo al altu la lleva que se puea, p’apurrinos a toa esa amalgama asturianista, que ye mui necia, una alternativa ilusionante, creible y capaz. Fainos falta, como dícía Hevia esti día.

Actualización: Decálogu del ruxideru.

Vos dexamos una memorable actuación del Coru Santiaguín sobre l’asuntu.

11 pensamientos en “La xuntanza me pone”

  1. Ai, amigu, lo que pasa ye que´l compromisu del BpA col Poder ye imposible de tapecer, y ye llacerioso ver como quieren el puestín arrenunciando a los sos divises básiques. Hai xente que me diz que nes bases del BpA hai nacionalistes de verdá, que nun comulguen con esi collaboracionismu…Pos que lo digan! O que dexen la formación ¿non?

  2. Entiendo lo que camientes, jesusito, yo tamién toi pola xuntanza de tolos partíos nacionalistes d’izquierdes, ensin dexar a naide fuera. Pero tamién albidro que la xuntanza de la web se refier a una xuntanza pa echar a esi psoe apoltronáu y xabaz escontra la identidá asturiana, partíu que, anguaño, IU y Bloque por Asturies tan sofitando (faciendo coalición con él). Esa ye la respuesta de por qué na web nun se citen direutamente.
    Polo demás, dafechu d’acuerdu. Saludos.

  3. toi d’alcuerdu en too menos no del Bloque.a min paezme tamien que sedria positivo cuntar con ellos,pero tamien me paez que tienen la mesma o menos voluntá qu’andecha d’axuntase.A lo meyor si ven esa xuntanza UNA-AA camuden d’opinión,pero agora mesmo veo imposible que’l Bloque dexe los puestinos.
    salú!

  4. Buff, nun sé si’l Bloque diba querer axuntase o non. La xunión del bloque con IU y col PSOE ye una estratexa política, y como tal pue cambiar mañana. Por eso pienso que, como partida, una apuesta pola xuntanza nun debería llendar opciones. A ver… qu’esto tien que dir p’alantre.

  5. Paezme unos plantegamientos utopicos viendolu dende dientru, a día de güei. Tamién ye verdá que los “llideres de caleya” de los micropartios políticos tienden a acoyonase cola presión del pueblu, nesti casu d’un aumentu considerable de voces que glayen pola xuntura.

    Paezme una propuesta perinteresante, pero como vien dixó jesusito, quien quiso puxar pola xuntanza dende l’entamu (va dos años), güei ta n’UNA.

    Unos (BpA) prautiquen l’entrismu políticu polos “puestinos y perres” demientrs otros siguen enfotaos en que ellos y solo ellos tienen la razón.

    x diox, tamos falando d’una riestra de persones qu’entre toos nun xunten un …

    Bono, nun voi estendeme. Bona iniciativa, la de pola xuntanza, y d’alcuerdu con jesusito, anque prestariame que se vieren les coses dende dientru pa saber que’l primer pasu qu’hai de dar p’algamar esi oxetivu ye “echar al paru” a munchos “llideres de caleya” qu’en munchos años nun fueron capaces de ver más alla que’l so “ego personal”. Tomai nota y mirai dende va unos 20 años p’aca.

    Fai falta savia nueva pal RESURDIMIENTU del nacionalismu asturianu.

  6. ¿Por qué sacais de la ecuación a Iniciativa Internacionalista? Esi pue ser un frente de coxuntura tanto a nivel nacional como estatal onde poner a Asturies nel mapa.

  7. Pa Fueya en blanco: que yo sepia, I.I. nun tien inda un enraigonamientu asturianu, anque hai un grupu de sofitu. Nun ye daveres una fuercia asturiana, anque pue llegar a selo, nun digo que non. Pero acaben de nacer.
    Vuelvo a dicilo: el Bloque, si camuda d´estratexa y fai autocrítica, podía entrar na mio opinión, pero a fecha de güei…ta crudo. Pero nesto de la Xuntanza hai que mirar a mediu y llargu plazu. Sumar, sumar, sumar…

  8. Ricardo, la intención ye bona pero faltente datos como ya dixo daquién.
    La xuntanza fíxose hai 2 años y hubo xente que quedó fuera y decidió siguir usando la sigla Andecha. Siempre va haber xente que nun quiera sumar porque son los “puros”, lo qu’hai que facer ye xuntanos al carru de los que sí busquen sumes y tienen mentalidá integradora.
    El proyeutu de la suma ye UNA agora mesmo. Ta na nuesa mano facer que salga p’alantre o non, pero si sumares UNA y lo qu’agora se llama Andecha diba salite otra Andecha o Sestaferia o lo que fuera. L’asuntu ye tener un partíu potente, anque haya otros pequeños.

  9. Nun yes el primeru que me fala de qu’UNA (daquella IAS) quixere facer xuntanza con AA, pero que una parte d’AA nun quixere y hubo una dixebra (política y anímica) n’AA. La web de la que tamos falando ye una manera de plantegar de nuevo la cuestión, como necesidá urxente n’Asturies. Yá lo tien dicho Carlos per dalgún llau, trátase de mirar pal futuru y sumar. Si AA vuelve a facer lo mesmo, pienso qu’habrá, entós, que facer escoyeta ente los que s’aislen y los que sumen. Pero la oportunidá hai que da-yosla a toos.

  10. Ricardo, vamos pensar qu’eso que propones cuaya. Y resulta que depués vuelve haber xente que sigue usando la sigla Andecha. Según tu entós ya nun valdría y habría que tirar polos que se quixeron xuntar. ¿Qué diferencia hai colo que pasó hai dos años? Nun lo entiendo.
    Lo que yo digo ye que siempre va haber un grupín de puros que van considerar que los demas son españoles, federalistes, vendíos o socialdemócrates. Y sin nun tuvieren la sigla Andecha Astur usarien Andecha Darreu que la tienen rexistrada, o sinon cualquier otra.
    La sigla Andecha nesti momentu sigue siendo conocida pa della xente, pero ye una carcaxa na que nun queden referentes de persones nacionalistes que seyan integradores o conocíes. De la xente conocido que tuviera n’Andecha ya nun queda naide.
    Yo namás te digo una cosa, compara la llista electoral de la UNA y la de la xente qu’usa la sigla Andecha y dime cuála ye la qu’aglutina al nacionalismu d’izquierda y cuála ye una llista compuesta d’irreductibles que nun se quixeron xuntar hai dos años.
    Esa xente a los que dices qu’hai que da-yos la oportunidá ya se-yos dio hai dos años, en 2007. Entruga-yos a los sos ex compañeros como salió’l tema.
    Pa llanzar al ciberespaciu una cosa asina lo primero ye informase. La xuntanza ya se fixo, agora lo que queda ye que la xente s’entere. Hai que mirar p’alantre y nun intentar un imposible que ye xuntase con quien ya demostró que nun se quier xuntar porque tien la verdá absoluta. Y por eso quedaron solos, nun lo escaezamos.
    Entiendo que la xente ayeno a la militancia, pueda dende los sos blogues con bon aquel sacar iniciatives d’estes, pero hai que ser un poco rigurosu, más que nada por respetu a la xente que dexó tanto atrás por una xuntanza na que ta casi tol mundu pero que, como dicía el cantar de Dixebra “a dellos nun-yos val”.

Leave a Reply

Your email address will not be published. Required fields are marked *

*