Inaciu Iglesias abraza el casquismu

Tamos acabantes de conocer que Inaciu Iglesias, y tamién Carlos Rubiera, abracen el casquismu. Y la verdá ye que yera d’esperar. Nel casu de Rubiera, yera conocía la so decepción (publicada al altu la lleva) cola traxectoria última del Pas, el partíu que cofundara años ha. Asina, una opción como la casquista, qu’aparenta beber de les fontes del rexonalismu más clásicu, abulta afayadiza p’abellugar una nueva ‘estratexa’ asturianista, seya de corte vilareyista o de mero autonomismu lliberal. Y too ello aunque tengan que compartir espaciu cola alloriante extrema derecha españolista de los de Asturias Liberal, por exemplu, (nun confundir con Asturies Lliberal) ente otres corrientes ‘peculiares’.

Nesi mesmu barcu xubióse tamién Inaciu Iglesias, quiérase o non, ún de los referentes del asturianismu cultural d’anguañu. Cuenten en La Nueva España que ye ‘asturianista confeso’, (traducíu debe ser más o menos ‘openly asturḷḷale’), magar que nun seya ‘asturḷḷale’ de los buenos. Lo que nun cuenten ye que, amás de xerente de Cartonajes Vir, ye’l principal responsable de la editorial Ámbitu, del selmanariu Les Noticies, dueñu de Trabe y L’Aguañaz; de lo que vien a ser el pequeñu gran conglomeráu cultural de la llingua asturiana, esi que, tengo sentíu en foros casquistes, ta ‘compráu a base de sovenciones’ pol PSOE. (Pártome).

A Inaciu Iglesias se-y podrán criticar munches coses, pero ser candidatu a l’alcaldía de Noreña por Foro Asturias (que sepamos Foru Asturies nun existe, como nun existe el Partido Asturianista), nun ye una d’elles. Abúltame que tanto Iglesias, como Rubiera, tan siendo consecuentes cola so forma de ver el mundu y de ver Asturies, y colos sos enfotos en ver que l’asturianismu de derecha ye quien a influir nes élites económiques y polítiques del país. Porque saben que presentando candidatos nun zulo, eso nun se consigue.

Va unos díes, Iglesias espublizaba esti videu nel que los diez segundos caberos abulten sarcasmu. De xuru que na cabeza taba dándo-y vueltes la idea de ser, xunto a Juan Vega (El Comentario.tv), candidatu casquista a rexidor de Proaza, ún de los más rellumantes cabezaleros de les candidatures llocales del FAC.

Dende equí, deseámos-y suerte na so aventura, aunque nun vamos facer como quier que faiga Juan Morales. Antes nos tatuamos la foto de Lastra en culu. ¡Por dios, que ye Cascos!!

3 pensamientos en “Inaciu Iglesias abraza el casquismu”

  1. Mira yo lo primero que toul que se exponga al publicu pa defender a Asturies asina n’abstracto ye meyor que quedar en casa protestando entos mira bien por ellos …

    Pero tamien te digo que existe un cieru centru drecha asturianu que parez que va huerfanu pela vida namas que golando a ver si bien un mesias a redimilos y parez que lo mesmo yo da sergio marques , que la evanescente liga asturiana, que cascos hoy que manhana el conde dracula si presenta una candidatura de les de sacar ….

  2. Paezme que tas un pocu equivocáu el nome de Partido Asturianista si existe y asina ta rexistráu nel MIR

Leave a Reply

Your email address will not be published. Required fields are marked *

*