Iconografía casquista

Esti asuntu del Cascos (cómo-y presta revolver a esti home) abúltame mui entreteníu. Quien vaya ser el próximu presidente del Principedo ye dalgo que me la refanfinfla enforma a estes altures. L’asuntu políticu ye lo de menos, porque confío nel bon xacíu de los míos p’axuntase y convertise na verdadera alternativa política del país d’equí a unos meses. Lo que de verdá presta del asuntu Cascos ye la iconografía que vien desendolcando esi movimientu que puxa pol líder.

Toes ese romeríes que faen perende a mayor gloria del santu Cascos son, a la vista de lo espublizao nos diarios, toa una amuesa de lo que ye la derecha asturiana de tola vida, n’estáu puro. De xuru que nun soi l’unicu al que-y flipa la pancarta esta de la romería de Xixón. “Gijón con Cascos” ye un eslogan tan salchicheru, paternalista y cutre que a cualquier asturianu-y paecerá atopadizu, caldiu, entrañable.

Na semeya sirvida pola axencia Efe malapenes s’aldovina la galería personaxes que participen na misa pol santu. Xente de les bases qu’aprendieron a ponese detrál del orador pa la semeya, como nes mises preconciliares, pero a los que-yos falta la dirección de los caros gabinetes d’imaxe y diseñu gráficu que comanden la escenografía pública de too actu de los grandes partíos políticos.

Imaxe y non conteníos. Eso ye lo que fai que la xente vote, lo que fai que’l pueblu asturianu se movilice y cuerra a Valencia de don Juan a afalagar al mesías de la derecha asturiana (echa-y un güeyu a la galería de Nacho Orejas en LNE).

La verdá ye que, procesiones del santu como la de la foto d’enriba, son Asturies pura, la mesma Asturies que va unos años enllenaba el pabellón de deportes d’Uviéu a la gueta d’un líder, d’una personalidá fuerte que-yos empobinara pel camín de la xente ‘de orden’.

2 pensamientos en “Iconografía casquista”

  1. Esti enriertu ta muy bien pero nun ta onde debe ,,, esto ye material ASTURIAN WEIRD FOUNDATION claramente ,,, 😀

    Lo meyor son los detalles … la banderuca asturies-espanha , el fechu de que l’homenaxe lu fixeren en Valencia Don Juan, miticu pueblu mas asturianu que lleones, imaxonolos cantando canciones d’excursion (“carrascar”, “para ser conductor de primera” … etc ) neal autocar fletau ad hoc pa dir de Mieres a Valencia DonJuan, esta selmana van a ver a Cascos el fin de selmana que vien a Chaves (Portugal) a mercar toalles … siempre xuntinos ,,,

    Esperando a Godot-Cascos ,,, y Godot-Cascos ,,, cagando pa ellos ,,,

Leave a Reply

Your email address will not be published. Required fields are marked *

*