Esti pequeñu aparatín foi’l primer ordenador que pasó poles mios manes, y el pasáu día 23 cumplió 25 años. Güei paez ridículo falar d’un ordenador con un microprocesador de 3,5 MHz y una RAM de 16K, el nuesu modelu yera de 48K, más otros 16K de ROM, pero la verdá ye qu’esta pequeña máquina, que mio güela-y regaló a mio hermanu cuando yo tenía 4 años, enchufada a un televisor y un radiocasete, valiónos pa hores y hores d’entretenimientu y permitiónos ponenos en contautu cola incipiente industria informática doméstica. Dende 1985 hasta qu’en 1993 dexó de furrular en condiciones y mio ma decidió tiralu a la basura cuando los mios collacios ya teníen eses maquinones nomaes 386, foi’l principal entretenimientu electrónicu de mio casa.
Angüaño conservo un modelu de 128K que foi nomau ZX Spectrum+ y que tien compatiblidaácoles cerca de 60 cintes magnétiques de software que conservamos, programaes pa 48K. Amás sirvionos de tituladora de video improvisada (el testu amosau en pantalla ye igual que’l teletestu).
¿Por qué falo güei d’esto?, nun se realmente porqué, quiciabes seya porque incoscientemente dende guah.e toi atraido por esti tipu de maquinines y nun se si por ecoloxismu informáticu me niego a almitir qu’un equipu ya nun val por que lo diga Micro$oft, afotunadamente Linux permite prorrogar la vida d’equipos vieyos. Y coses que pa mio pa son mui modernes (hai que tener en cuenta que los de la so edá conocieron la televisión con casi 20 años) pa min son recuerdos de la infancia… el ZX Spectrum cumple 25 años, yo acabo cumplir 26…
LOAD “”
Madre que vieyu soi, cómo pasa’l tiempu. Alcuérdome que d’aquella mercaba dacuando la revista Microhobby, que venía con trucos y demos de xuegos pal spectrum y que nún de les sos portaes dicía dalgo asina como que ‘Los espertos dicen qu’en diez años, quien nun sepa manexar un ordenador sedrá consideráu un analfabetu”. Quedé ablucáu, nin de lloñe vía venir lo que depués vendría. Pero es que d’aquella entá nun había nin CD’s, y namás los ‘profesionales’ furrulaben con disquetes de cinco pulgaes y cuartu. Y claro, yo flipaba en casa d’un collaciu que tenía un Commodore 64… la bomba, con casete integráu y too. Jeje. Col tiempu, sicasí, quedó claro qu’el gran inventu foi el Spectrum., ¿que no?