Asturian entertainment

Goyo Ramos

Va unos meses qu’entamó les sos emisiones la TPA. Magar la pila perres invertíes nella, la canal pública asturiana de televisión nun algamó entá un índiz d’audiencia más allá del 3% del share mediu diariu. ¿Qué falla? Crítiques tien habío abondes dende l’entamu les emisiones. La falta del usu de la llingua asturiana nes emisiones ye una d’elles. Pero la otra, la razón fondera de la pobretaya audiencia de la TPA ye la falta d’asturianidá de los sos conteníos. Los resultaos paez que concuerden con eses crítiques. Un humorista madrilanu de medio pelo, que nin conoz nin siente la idiosincrasia asturiana, nun pue aspirar a que-y rían les gracies como si fuera Jerónimo Granda, Cellero o El Maestru, por poner un exemplu. D’otra manera, un presentador amenorgáu, rescatáu de la emisora de la Ser en la llocalidá de Madrid, nun pue metese a cocineru chisposu ensin esperar un fracasu rotundu. ¿Qué pasa entós? ¿Cuál ye la solución? Ta nidio: recurrir al ‘asturian star system’.

Sigui lleendo Asturian entertainment

¡Probes fabricantes de bolses d’aspiradores!

Primeru montaron la de coyer los que carretaben xelu de casa en casa encuantes salieron les primeres neveres, llueu los que vendién música en caxes de plásticu encelofáu cuando apaez internet… y agora los fabricantes de bolses d’aspiradores…

Y de pasu un videu de un raperu que paez tener claro que’l sistema cambeu hai tiempu… otros nieguen lo evidente… Esto si que ye rap transgresor y no lo d’Eminem.
https://www.youtube.com/watch?v=wd8Id1iZcnQ

Si vos prestó el videu: MC Lars

Alloriante conciertu en Pyongyang

Posiblemente, esti ye ún de los más pavorosos videos que cuerren pel youtube. Ye un conciertu del grupu surcoreanu ‘Shinhwa’ en Pyongyang, cuido que nun d’esos festivales de xermandía coreana empobinaos dende va unos cinco años polos gobiernos del Norte y el Sur de Corea, col enfotu inicial d’averar postures y, al tiempu, permitir restrinxíos realcuentros ente families separtaes dende la guerra entrambos llaos del paralelu 38.

El caso ye que dende entós sucédense, pesie a les tensiones y distensiones, eventos d’intercambiu baxo’l lema d’una corea xunía (al fondu l’escenariu relluma la silueta la península). Sicasí, como s’amuesa nel videu, la distancia entrambes corees ye entá abismal.

https://www.youtube.com/watch?v=QM1avYwLC6I