Votez Bové!!

Entamó güei la campaña pa les eleiciones presidenciales franceses. Viva la República. Porque nun ye namás que en Francia la xente puea votar y escoyer al so xefe d’Estáu, amás ye que hai un códigu pa que, pente la campaña, tolos candidatos tengan les mesmes oportunidaes, no que seya posible.

Ello ye, los espacios de propaganda nos medios de comunicación públicos han ser los mesmos pa caún de los dolce candidatos. Y tolos medios han facer malabares pa nun favorecer a un candidatu pente los demás. Ello ye: al menos, sobre’l papel, democracia. Lluéu de xuru que Ségolène Royal y Nicolas Sarkozy van poder pagase más espacios propagandísticos nos medios privaos y la presencia de los candidatos pequenos va ser amenorgada d’alguna manera… Pero en principio, los franceses disimulen. Equí no, equí o tienes perres y bones relaciones col empresariau potente, o vas de culu, porque nin si quier se disimula.

A mín préstame la candidatura de Bové. Si fuera francés votaría-y. Creo. Siempre me paeció un paisanu, nun sé. Los suyos tan faciendo n’esti tiempu una campaña n’internet coordinada nes webs Unis avec Bove, Votez Bové y José Bové 2007, que paez la oficial. Nelles, la xente va apurriendo los sos propios banners, cartelos y materiales de campaña que-yos peta. A ver que tal-yos va, porque eso de la propaganda ‘llibre’ ye daqué qu’equí entá nun lo vi trabayar enforma.

Hometown Baghdad

Quiciaves dalgunos yá la conocéis. ‘Hometown Baghdad‘ ye una videu-log, miniserie documental o como lu queráis llamar, na que un grupu de mozos de la capital iraquí graben les sos inquietudes y esmolecimientos pa cunta-yles al mundu. El proyeutu ta empobináu por la productora neoyorquina Chat the planet, qu’apurrió-yos a los protagonistes tol material al través de productores audivisuales iraquíes.

Les ganes que tienen de colar del país, la pena pola marcha d’un collaciu o los problemes d’un país enllamargáu na guerra son dellos de los asuntos que s’amuesen na retafila videos que cuelguen cada llunes.

El fechu de que falen toos a les cámeres n’inglés, que seyan universitarios, que vivan en xalés, fai pensar que son toos de clase ‘acomodada’, pero la verdá ye que val pa facete una idea de lo que ye anguaño aquel país. El que sepa dalgo d’inglés nun va tener problema pa entendelos…. ¡falenlo como nosotros!

Nesti videu, Saif, un estudiante de 22 años, atópase con qu’el so gobiernu nun-y da’l títulu de dentista nun siendo que se comprometa a permanecer nel país trés años. Dilema.

[kml_flashembed movie="http://www.youtube.com/v/IeDGYJiOuRU" width="425" height="350" wmode="transparent" /]

El Meme, La Meme…

Meme

Ta la blogosfera asturiana enfotada en siguir la cadena del ‘meme’. A nós propúnxonos Pingarates y depués VityUvieu (Fueya en Blancu) y nun díbamos ser menos. La mio tipografía (esto nun tá consensuao polos dos webrothers) ye ‘arial’ (al otru webrother presta-y más la ‘verdana’) . Una web imprescindible: http://www.pornotube.com (namás pa mayores de 18 años) y un blog n’otra llingua http://joseangelfernandezvilla.blogspot.com (namás pa mayores de 18 años bizarros).

Agora tócanos pasa-y el recáu a otros trés blogues…

El fortín del chamicu

Xabel diz

MunduXaime

Gracies a Pingarates pola propuesta y a Lux Omnia Vincit pol analís que fai de la mesma.

Güei, cine

Enllace de descarga

Archive.org, esi sitiu nunca bien ponderáu, ufierta un nuevu serviciu, entá en fase beta, qu’abúltanos de lo más prestoso. Amás d’ufrir la posibilidá de descargar archivos nel dominiu públicu o non suxetos a torgues na so distribución, copia o difusión, tamién ufierta delles películes en streaming en formatu .flv. N’amuesa, déxovos el perprestosu El Gabinete del Doctor Caligari (títulos n’inglés).

Cuenques freak show (El blog de Villa)

Güei flipé al atopar el blog de Villa, esi home de verbu floríu al que-y llambe la punta bona parte del prexubileríu. Paga la pena pasase perhí y echar una güeyada a un blog que, por demás, ye’l coñazu más grande que vos podéis imaxinar. Cuido que, colo tecnolóxicu que ye un home incapaz de pronunficar de siguío ‘ácido acetilsalicílico’, ye un pariente el que-y ‘cortipega’ los discursos colos qu’enllena de posts infumables esta auténtica fricada. Pero dacuando tien perles, como esa tendencia villista a citar a Antonio Machado (pamidea l’unicu llibru que tienen na biblioteca del SOMA ye ‘Campos de Castilla). Darréu qu’el blog de Villa resume toa la intelectualidá del prexubileríu y el sociateríu astur, que tamién apurre cites propies d’esos calendarios pa llevar en monederu con cursis frases d’autoayuda del tipu: “Los silencios a tiempo son tesoros en el tiempo” o “Los aduladores tienen forma de amigos como los lobos tienen apariencia de perros”. Grandes verdades rescamplen nel pensamientu de Villa. Dame la risa.

Otra de les perles d’esti blog son les imáxenes. Namás-y falten unicornios esnalando pel cosmos. Anque tamién atopes semeyes como esta, na qu’apaez Villa tou gallasperu xunta Alfonso Guerra y un par de maderos que disimulen col pañuelín bermeyu de dir a Rodiezmo. Impagable. Asturies, que guapina yes. Con fabes y sidrina nun fai falta gasolina. Les muyeres y les mazanes tienen de ser asturianes. Puxa’l SOMA.

Villa Guerra