Banca halal, banca moral

Esti día, en La Vanguardia, falaron del ésitu que ta algamando la banca halal o banca islámica en Marruecos. Unos meses atrás, en El Economista, falaben de la posibilidá de qu’abriera n’España el primer bancu d’esti tipu, al estilu del que, dende 2004, ta abiertu en Londres, el Islamic Bank of Britain.

IBBAl contrariu del mou en que la Banca Vaticana marafundia perres en la Bolsa, o del opusín Banco Popular, la banca halal se presenta como una banca moral. Nella, el cliente nun ye talo, sinon que ye un ‘sociu’. Ún de les máximes que mueven la banca islámica ye la fatua qu’empobinara un conseyu islámicu va unos años na que consideren pecáu el cobru d’intereses, por cuanto pal Islam, el dineru per sé nun pue tener valor dalgún, nin puede xenerar más dineru. El dineru namái se pue emplegar pa producir, pa xenerar dalgo valoratible.

Nel reportax de La Vanguardia, desplicaben el funcionamientu d’esta banca con un exemplu: un grupu de mozos que cada mes ponen una cantidá de perres, de mou que cada ún d’ellos van poder disponer nún de los meses que dura la asociación de tol dineru y poder facer asina la compra que deseen. Ye como comprar a plazos, pero ensin intereses.

La banca funcionaría igual. Cada mes pones perres pero nun pagues intereses, porque’l bancu sedría sociu desa componenda y los gastos d’alministración sedríen compartidos.

Cuenta La Vanguardia que la banca islámica presenta trés variantes: la iyara, que te permite entrar nun pisu de renta con opción a comprar nun plazu prefixáu; la mucharaka, la ya mencionada fórmula de creitu na que se comparten beneficios y gastos ente banca y veceru/sociu; y la murabaha, na qu’el veceru pidi-y al bancu que-y merque un pisu pa que-y lu revenda al preciu de compra más un beneficiu pactáu (casi que lo mesmu que la banca tradicional, anque vistíu d’otra manera).

De xuru qu’ayalgueru, que ta más metíu nestes coses ;), podría desplicar meyor el tema. Paez que yá hai dubies al rodiu de les garantíes qu’ufre esti sistema: que si quién garantiza too lo ‘jalal’ que ye’l bancu, que si a la fin nun hai diferencia cola banca tradicional… nun sé. De mano, nun paez un mal sistema, y sí paez ‘moral’, más nestos tiempos que cuerren, con tol mundu alloriáu col Euribor.

Un comentariu en “Banca halal, banca moral”

  1. ye la manifestacion d’un fenomenu mas ampliu … cada vez mas los inversores mas alla del beneficiu preocupense dende un puntu de vista moral en que coses se invierten les sos perres … hay , por exemplu , un mercau cada vegada mayor de fondos de inversion “eticos” que nun invierten en enerxia nuclear o en armes o lo que seya.

    La relixon musulmana ye muy prescriptica de lo que se puede y non se puede facer asina que ye normal que surdiera un proveedor de servicios pa satisfacer los requirimientos de los musulmanes practicantes.

    Aparte de la banca minorista que igual ye lo mas visible se que en londres ca vegada hay mas del toul tema islamicu de renta fixa , fondos de inversion y project finace.

    Nun vaigas pensar que soy un expertu en islamic finance ,,, el mi estilu de vida ye incompatible dafechu con los preceptos de la relixon islamica ,,, 😉

Zarráronse los comentarios.