Asturlinux y como fui a instalar Debian

Logo d'AsturlinuxD’un tiempu a esta parte vengo sintiendo crítiques dirixíes a Asturlinux, tachándolos de forma totalmente gratuita de nun facer nada. Sentí demasiaes veces la yá tristemente famosa frase de “Ye que faen unes xornaes de Software Llibre al añu y nada más”.

Yo yá empiezo a tar fartu de sentir estos argumentos vacios y qu’amuesen un desconocimientu total del trabayu desendolcáu por Asturlinux. Lo peor de too ye que normalmente estos comentarios vienen de xente que tan en casa ensin facer nada y que seríen capaces d’iguar tolos problemes del mundu… pero ye que nun tienen tiempu…

Puede que tengamos munches coses que criticar a Asturlinux, al fin y al cabo les asociaciones llévenles persones que, como toos, nun son perfectes. Pero de lo que quiero falar ye de la mio esperiencia personal con Asturlinux (y nun soi nin fui sociu).

Cuando por fín entró en mio casa un modem de 56 kb y pude coneutame a internet, pude lleer sobre GNU/Linux muncho más comodamente y más tiempu que los pocos ratos que podía parar nel cibercafé que taba delantre’l Lord Byron d’Avilés, y restolando pela rede acabes dando con Asturlinux, una asociación d’usuarios asturianos d’esti sistema que tanto me llamaba l’atención, tanto técnicamente,  como pol so sentíu éticu. Soscribime a la llista de corréu, y nun participé hasta que depués de tanto sentir les bondaes de “LA DISTRIBUCIÓN” la famosa Debian, entrugué si daquién yera a facilitame una copia d’esta distribución. Hasta entonces namás que fui a faceme con dalguna copia de revistes espcializaes (Mandrake, Suse y Red Hat) y la idea de baxar 5 CD col mio modem de 56 kb nun yera mui alentadora. En dos díes quedé con un sociu d’Asturlinux (creo que foi wikier, sicasí nun toi seguru) na estación de tren d’Uviéu y a cambiu de 5 cd virxenes conseguí una copia de Debian Potato (sería l’añu 2001), foi’l primeru d’un montón de problemes que m’aidaríen a resolver dende la, al mio entender, histórica asociación. Gracies a ellos conseguí echar a  andar per primer vegada el wifi del mio ibook en Debian ppc, o entendí lo que yera un script de shell… en gran midida son “culpables” de qu’agora yo seya un activista del Software Llibre…

Puede que de cara a la galería namás que ficieran unes xornaes (más qu’interesantes por cierto), pero lo cierto ye qu’Asturlinux contribuyó y contribuye a la difusión del Software Llibre n’Asturies como naide lo fizo hasta agora, yo personalmente como usuariu de GNU quiero dar les gracies a Asturlinux pol so llabor nestos 12 años.

Un comentariu en “Asturlinux y como fui a instalar Debian”

  1. Y gracies a xente como asturlinux, empezamos a oyir falar de esa cosa rara que nun ye windows, pero que ye infinitamente meyor, y les charres que ficieron nestos años amosáronnos lo que otros nun quieren dicinos

Zarráronse los comentarios.