Asturian entertainment

Goyo Ramos

Va unos meses qu’entamó les sos emisiones la TPA. Magar la pila perres invertíes nella, la canal pública asturiana de televisión nun algamó entá un índiz d’audiencia más allá del 3% del share mediu diariu. ¿Qué falla? Crítiques tien habío abondes dende l’entamu les emisiones. La falta del usu de la llingua asturiana nes emisiones ye una d’elles. Pero la otra, la razón fondera de la pobretaya audiencia de la TPA ye la falta d’asturianidá de los sos conteníos. Los resultaos paez que concuerden con eses crítiques. Un humorista madrilanu de medio pelo, que nin conoz nin siente la idiosincrasia asturiana, nun pue aspirar a que-y rían les gracies como si fuera Jerónimo Granda, Cellero o El Maestru, por poner un exemplu. D’otra manera, un presentador amenorgáu, rescatáu de la emisora de la Ser en la llocalidá de Madrid, nun pue metese a cocineru chisposu ensin esperar un fracasu rotundu. ¿Qué pasa entós? ¿Cuál ye la solución? Ta nidio: recurrir al ‘asturian star system’.

Les cabeces pensantes de la TPA nun se decataron, o nun quixeron, de que n’Asturies cuntamos con un star sysren perafayadizu dende va pila d’años. Xente como Cholo Juvacho o Niti Colsa lleven faciendo del ‘entertainment’ astur una seña d’identidá plagada d’exitos.

Niti Colsa Niti Colsa ye tou un exemplu pa munchos ‘entertainers’ d’España. Dende qu’entamara la so carrera artística como intérprete de bandurria del Frente de Juventudes uvieín, esti home fizo del espectáculu un mou de vida. Ye, dafechu, el Frank Sinatra asturianu. Como bon vocalista, tien tocao tolos estilos, dende la canción tradicional asturiana, hasta la música disco, pasando pel pasodoble y la canción melódica, posiblemente el xéneru au meyor s’atopa, y col que triunfa anguaño énte’l públicu británicu del hotel de Benidorm (esa Las Vegas levantina) onde actúa casique a diariu.

Niti Colsa ye, de xuru, ún de los esponentes de toa una xeneración d’entertainers asturianos na que atopamos a xente que, col sofitu del públicu como principal aliciente, tienen desendolcao una bultable carrera musical y humorística. Ye xente como Vicente Díaz, Manolo Santarúa o Pipo Prendes ente bien d’ellos.

https://www.youtube.com/watch?v=Q7ZQB14bwYY (Pipo Prendes en Lastres)

En delles comunidaes autónomes, la televisión pública sirviera precisamente pa espoxigar el llabor d’estos profesionales del entretenimiento. Programes como ‘Luar’, na televisión gallega, sirvieron incluso pa esparder más allá de les lliendes del país vecín la música y l’arte de los ‘entertainers’ galaicos. Prueba d’ello, ye la importante presencia d’orquestes y grupos musicales de más allá del Eo nes romeríes y fiestes asturianes. La etiqueta “Orquesta de la televisión gallega” da-yos a estes formaciones un prestixu incontestable qu’obligó a les formaciones asturianes a adaptase pa poder mantenese nel candeleru, como ye’l casu del grupu Tekila.

Xente como les orquestes Alto Standing, Assia, Dominó, Metal Brass o munches otres, faen de la calidá la so seña d’identidá. El so llabor, entá nun algamó la reconocencia que merez, magar que tienen fecho de la so asturianidá una de las cualidades del so estilu.
Dominó (Orquesta Dominó interpreta ‘Nel pozu Maria Luisa’).

Pero l’entertainmet asturianu va muncho más allá de los vocalistes melódicos y les orquestes. La oferta complétase con intérpretes instrumentales, capaces de llenar l’escenariu armaos namás que con una gaita, un tecláu o un curdión y la so voz. Ye xente que percuerre dende cuantayá romeríes, bodes y celebraciones de toa mena animando al personal. Xente que fai movese a la so audiencia ensin grandes alardes, ensin promociones ablucantes.Tony Lana

Xente como Tony Lana, que lo mesmo canta a so nieta qu’Asturies o a México, y que ta presente nes discoteques asturianes gracies a esi templu discográficu astur nomáu Grabaciones Pola. Nel so catálogu atópense dellos de los más bultables exemplos del ‘entertainment’ astur, como ‘La Cirigüeña’, un peculiar grupu que fizo del so peculiar estilu humorísticu un éxitu incontestable, con esa fórmula d’esbillar melodíes populares con lletres coñones: “Ellos dicen que non, pero chumen” (con música de los Village People), por exemplu.

Como nun podía ser d’otra manera, la bultable escena asturiana tien el so espaciu nel star system internacional. Bien d’ellos exemplos hai con artistes de la talla de Hevia o Víctor Manuel, pero tamién de solistes melódicos como Danny Daniel, que desendolca anguaño un valoratible llabor musical dende Miami.

Danny DanielEstos profesionales, depués de décades de trabayu pisando escenarios, en mítiques sales de fiesta asturianes y d’España, en fiestes de prau, en estadios o en televisiones, fixeron posible que la escena asturiana fuera desendolcando una bayura d’estilos pa tolos públicos, dende los más pequeños (como l’exitosu al empar qu’educativo Show de Susana) hasta los más mayores, yá sean amantes del pasodoble, la tonada o l’humor gafientu.

Lo que ta claro con tou esti repasu, ye que nun tamos falando d’una xeneración d’oro, sinon d’una realidá, d’un país con una bayura d’artistes qu’entá nun algamara el sitiu que-y correspuende. Y la TPA tien munchu que facer nesti sen.

De fechu, tamos falando d’una realidá que tien cuerda pa munchu, que ya cunta con xeneraciones nueves qu’apunten maneres enforma, y que faen de la música y l’espectáculu tou un mou de vida.

Ye’l caso de la gallaspera Sara Moritán, que de la televisión saltó al ‘star system’ infantil.

https://www.youtube.com/watch?v=Si4-DOku2lE

O de Luigi López, que, magar de la so mocedá, tien ya fecho dellos conciertos por América Latina.

https://www.youtube.com/watch?v=6TQbrhOPW-Q

Nun pue tar más nidio. La TPA tien munchu trabayu que facer, y reconocer a un ‘star system’ que ya tien la reconocencia del públicu, nun pue ser tan difícil. Otres cadenes, más humildes, como la pionera Telegijón, supo ver el filón cuantayá, y vio xorrecer estrelles mediátiques con mui poco esfuerzu.