¿Alcuérdeste de cuando navegabes a 9.600 bps?

Qué sería de nosotros si nun fuera polos americanos. Son ellos los que paguen (al traviés de dineru públicu y de fundaciones privaes) l’Internet Archive. La información ye’l poder, y ye d’ellos. El casu ye que gracies a esa ferramienta ye posible restolar más o menos polo que yera l’internet n’asturianu allá pelos inicios del www. Diba poco que s’estrenara’l protocolu http, y la llingua ya tenía’l so requexín na rede.

Pa entós (falamos de 1997), ya había dos clares referencies qu’entá güei lo siguen siendo: Araz y su asturies.com (qu’entós presentábase col cosmopolita nome ‘Asturia, the asturian community’),

y Próspero Morán AKA Asturnet, y el so diariu pioneru n’asturianu: Asturnews. Calcando nes imáxenes diréis al enllaz del Archive que vos permite navegar como si tuviéreis nel sieglu pasáu.

D’aquella, navegar yera cosa de dir a ún de los pocos cibers qu’atopabes perhí, o de tar na Universidá. De fechu, la mayoría de les webs que se ven nos enllaces recoyíos nel Archive tan agospiaes n’uniovi.es, anque tamién n’asturnet.com, bheta.com o mrbit.com.

Tamos falando d’una Internet na que nun había tarifa plana, y pela que navegabes a 9.600 bps, a 9 kas por segundu, más o menos. Pa entós, a la vista del enllaz d’Asturia, teníes canal IRC n’asturianu y el grupu de noticies soc.culture.asturies.

Y poco más. Que nun ye poco. D’aquella, tamién via Asturia, namás la conseyería de Fomento del Principáu tenía presencia na rede, y la prensa asturiana taba a otra cosa: namás podíes lleer El Comercio, y ello porque dos estudiantes encargábense d’esbillar les sos noticies ya ‘instalarlas’ (d’aquella lo de ‘actualizar’ entá nun taba n’usu), nel web. A cambiu, unviáben-yos el periódicu gratis a casa.

Como El Comercio, tamién el suplementu Alitar Asturies tenía el so espaciu, y tamién pol enfotu de los sos llectores.

Diba haber qu’esperar entá unos años pa que futures referencies, como lne.es, apaecieren nel Internet, y ello depués de decatase que ya hebo ún que se-yos adelantó y compró los dominios lanuevaespana.com, .net y demás. Madre, y nun pasaron más que una docena d’años.