50 millones de los asturianos pa ArcelorMittal

200px-lakshmimittal22082006Nun ye que a esti paisanu-y quede esa sorrisa pola pasta que-y paguemos los asturianos. Apurada la cuenta, pa él 50 millones d’euros son caxigalines, lo que gasta pa la boda de a fía.

Pero el casu ye que, colo que voi recordar agora, a lo meyor pagábemos el sobrecoste del HUCA, por poner un exemplu.

Esti día, cuando anunciaben qu’ArcelorMittal diba amenorgar entá más la so actividá, apagando un fornu altu y nun sé que más, alcordeme d’una anuncia d’eses de postín, de les que tanto-y presten al presidente Areces. Foi enantes de la crisis, en mayu de 2007, cuando sobrábennos les perres, cuando el presidente Vicente anunció un alcuerdu pa invertir 100 millones d’euros (16.639 millones de pesetas) nel centru d’I+D d’Avilés de la siderurxa recién comprada pol magnate hindú. De too esi dineru, la mitá diba ponela, en cinco años, el Principedo. La parte d’ArcelorMittal, nes sos propies instalaciones, suponse que la pon.

El casu ye que Areces comprometióse a que los asturianos díbemos poner del nuesu dineru, cincuenta millones d’euros. Asina que tamos dándo-y a la empresa d’esti señor de sorrisa afable l’equivalente a catorce veces la asignación ‘récord’ comprometida pol Principedo a política llingüística, por poner otru exemplu.

¿Contraprestaciones por esa ‘inversión’? Que a lo meyor contrataben a una trentena de becarios en cinco años…. Más datos, diolos d’aquella la prensa.

Agora pregúntome yo… ¿facía falta gastar les perres d’esa manera? ¿Ye una especie d’impuestu revolucionario? ¿Nun bastaba con face-y a ArcelorMitta el Centru Teunolóxicu públicu del Aceru d’Avilés?

5 pensamientos en “50 millones de los asturianos pa ArcelorMittal”

  1. Agora mesmo, cuando escribís esto, hai un puñarráu de pequeñes y medianes empreses asturianes esperando por un aval (un papel firmáu) del Gobiernín pa desbloquear créditos y siguir funcionando, o reducir plantilles, o pesllar…
    ¡Pero nun hai manera!.
    A unos tanto y a otros tan calvo.

  2. Préstanos en forma dicivos que acabais de ganar el primer concursu de la hestoria de la blogosfera en llingua asturiana. Esti premiu (premiu moral, que nós nu tenemos subvención… :-D) tien el valor especial que-y da’l fechu de que fueron los propios blogueros y blogueres los que decidieron llibremente.

    Como ye la primer y única vegada que se fai (hasta’l momentu…) podeis dicir a bocona abierta que teneis el meyor blogue en llingua asturiana de tolos tiempos!!! dende que’l mundu ye mundu!!!!!

    Norabona y a siguir asina. Felicidaes.

Leave a Reply

Your email address will not be published. Required fields are marked *

*